Согласно со одлуката на Светиот Синод на Бугарската Православна Црква, по деветти пат во поновата историја на Бугарската Патријаршија беше осветено Светото Миро.
Чинот на осветувањето се одржа за време на Василиевата света Литургија на Велики Четврток, на која началствуваше Бугарскиот патријарх Даниил во патријаршискиот храм „Св. Александар Невски“, во Софија, во сослужение на голем број архијереи и свештенослужители на Бугарската Православна Црква
За време на великиот вход, садовите со Миро беа изнесени од олтарот и повторно внесени низ царските двери, поставени до светата трпеза и отворени. Потоа започна чинот на осветување на мирото.
Според утврдениот ред, пред читањето на Господовата молитва „Оче наш“, патријархот Даниил ги прочита соодветните молитви и ги благослови садовите во кои се чува светото миро. Потоа во нив додаде и дел од мирото чувано во алабастерен сад, подарен на Бугарската Православна Црква од Цариградската Патријаршија во 1945 година, кога беше укината седумдесетгодишната шизма над Бугарската Егзархија.
„Во Христовата Црква, миризливото свето миро има богата и длабока симболика. Како задолжителен елемент при осветување на светата трпеза, тоа е знак и симбол на Господовиот гроб – гробот од кој изгрее Животот, зашто смртта не можеше да Го задржи. Светото миро се користи и при осветување на светиот антиминс, кој исто така го симболизира положувањето на Спасителот во гробот. А според свети Симеон Солунски и други отци и учители на Црквата, светото миро ја симболизира и богатата благодат на Пресветиот Дух, Кој Бог великодушно ја излева врз нас – погребаните во Христовата смрт и возродените за нов и вечен живот со Христа, во таинството на нашето обновување“ – рече патријархот Даниил во своето слово и додаде дека „приготвувањето на мирото е едно од најсветите настани во црковниот живот, како и уште една причина за радост и благодарност кон Бога за дарот на автокефалноста, од кој се радуваме и денес, и кој сведочи за зрелоста и полнотата на возраста на Христовото совршенство (Еф. 4, 13). Да се радуваме на овој голем дар, но и да се стремиме да бидеме достојни за него, зашто за секоја Православна Црква, автокефалноста е не само чест, туку уште повеќе – одговорност, не само привилегија, туку и дар што обврзува“.
По завршувањето на светата Литургија, Високопреосвештените митрополити ги пренесоа садовите со веќе осветеното Миро во просториите на Синодот, каде што беа положени пред иконостасот на параклисна црква „Св. цар Борис Покрстител“, а потоа ќе бидат сместени во Миротеката на Светиот Синод за чување.
Извор: https://bg-patriarshia.bg/news/tarzhestvena-sveta-liturgia-i-deveto-osveshtavane-na-miro-v
Source: https://liturgija.mk/aktuelno/pravoslavni/devetto-osvetuvanje-na-miro-vo-bugarskata-pravoslavna-crkva/
