Денешниот празник, во чест на изнесувањето на светиот Крст пред верниците, заради поклонение и благослов на водите, се совпаѓа со почетокот на Богородичниот пост. Празнувањето на овој празник започнува да се прославува најпрво во Цариград, за време на царот Мануил Комнен во чест на ослободувањето на престолниот град, каде што на овој ден се изнесувал чесниот Крст од ризницата на великата црква Света Софија пред верниците, за да се поклонат, да го целиваат и да добијат осветување и за да прекинат болестите кои се ширеле во тој период од годината. Со Крстот се правела литија низ целиот град, за да се благословат сите жители, и литијата се движела од храм до храм, обиколувајќи ги сите храмови. Потоа пак го враќале крстот во ризницата.

Во чест на светиот Крст имаме неколку празници:

1. Воздвижение на светиот Крст, кој го празнуваме на 14/27 септември;

2. Крстопоклона недела, т.е. третата недела од Великиот пост;

3. Појавувањето на знакот на Крстот на небото, во времето на Констанциј, синот на свети Константин, кој се слави на 7/20 мај;

4. Секоја среда и петок се денови во кои си спомнуваме на Крстот и на распетието на Господ.

Речиси секогаш кога се празнува споменот на Крстот, се осветува водата, па така и на овој празник се извршува водосвет во сите храмови, за благослов на сите верници, за да добијат сила од Бога за правилно да постат во текот на овој и на сите пости на Црквата. Исто така на секој празник на Крстот им се дели босилок на верниците, како симбол на Крстот Христов.

Свештеник Јани Мулев

Види: Крст и босилок

Светите Отци за Крстот Господов

Потеклото на Крстот

Воздвижение на Чесниот Крст