Монах Михаил Хаџиантониу

За тоа до кој степен епископите и свештениците станаа државни службеници откако Хунтата (во Грција) им даде плати, располагаме и со правно мислење. Иако јас немам ништо лично против Високопреосветениот владика Јеротеј Влахос, бидејќи го сметам за еден од најдобрите епископи на Грчката црква, но морам да го спомнам пак. Во текот на повеќе години тој имаше спор со игуменот на манастирот „Преображение“, о. Спиридон, за тоа, кој командува во таа епархија. Во тоа време отец Јеротеј посетил еден манастир во друга епархија. Игуменот му рекол:

• Јеротеј, запомни, дека епископот е како свекрва во монашката обител. Колку подобро ќе го сфатиш ова, толку порасудливо и непринудено ќе стане твоето присуство кога посетуваш некој од твоите манастири.

Владиката му одговорил:

• Јас сум монахофил!

Игуменот го прашал:

• Може ли еден Грк да каже „јас сум гркофил“ и да звучи логично?
• На што мислиш?
• Ти си монах, нели?
• Да.
• Епа, тогаш зошто е тоа „монахофил“? Има ли логика? Почитувајте го братството на еден манастир. Не ни кажувајте постојано вие епископите, „така да ја направиш камбанаријата, а така црквата“. Ние живееме тука, остави нѐ да си воведеме наш ред и да имаме мир. Исто така помисли и друго нешто: секој монах си има по некоја своја лудост. Ако нема доволно лудост, тој не би дошол да живее во планината, во дивината. Остави го на мир, на крајот од краиштата!

Во војната меѓу владиката и игуменот Спиридон беа употребени сите средства, со кои располагаа завојуваните. Главното оружје на владиката Јеротеј, за да ги натера да се потчинат, беше одбивањето да му ракоположи монаси за свештеници (јеромонаси), и така го блокираше нивното секојдневие, бидејќи немаа доволно свештеници за службите. Тогаш игуменот Спиридон поднесе жалба до световниот суд со поплака за злоупотреба на власт и поважното со аргументот: „Како државен службеник добиваш плата од државата, а не си ја вршиш добро работата, која си должен да ја вршиш“. Судијата сметал дека начинот на изразување на обвинителот е толку умесен, што дури и во решението на судот се содржеле истите зборови: „Вие сте државен служител и како таков добивате плата од државата. Вие сте должен да ја вршите работата и да отидете и да ракоположите свештеници“. После овој случај, владиката Јеротеј, како добар државен службеник, отиде и ракоположи неколку монаси.

Превод: Свештеник Јани Мулев