…Тогаш Царот ќе им каже на оние што Му се од десната страна: „Елате, благословени од Мојот Отец; наследете го царството, приготвено за вас од почетокот на светот; оти, гладен бев и Ми дадовте да јадам; жеден бев и Ме напоивте, странец бев и Ме примивте; необлечен бев и Ме облековте; болен бев и Ме посетивте; во затвор бев и дојдовте при Мене“. Тогаш праведниците ќе Му одговорат и речат: „Господи, кога Те видовме гладен и Те нахранивме, или жеден и Те напоивме? Кога Те видовме странец и Те прибравме, или необлечен и Те облековме?  Кога Те видовме болен, или во затвор, и Те посетивме?“  А Царот ќе им одговори и рече: „Вистина, ви велам: доколку сте го направиле тоа на еден од овие Мои најмали браќа, Мене сте Ми го направиле“ (Мат. 25, 34-40).

Молитва од свети Филарет Московски кон Господ Исус Христос:

Господи Боже, Спасителу и Создателу мој! Нека биде благословено Твоето Свето име. Благодарност и слава Ти упатувам, за сите Твои добрини, кои ги добив од Тебе во мојот живот. Сега, пак, тага и болка најдов, и Твоето име Го повикувам. Понижувања ме снајдоа, ме ставија во подземен ров, во мрак и смртна сенка. Жалам за сѐ и по оваа тага сфаќам дека згрешив пред Тебе, и поради моите гревови ме снајдоа толку неволји; бидејќи Твоите праведници не очајуваа и во затворите Те славеа Тебе, и во страдањата се радуваа. И ако гледаш на беззаконијата, тогаш кој ќе опстои, Господи? Бидејќи нема човек кој не згрешил. Но, Ти, Господи, ги понесе гревовите на целиот свет, и со покајание ги очистуваш. Верувам, дека и мене грешниот нема да ме отфрлиш од Твоето лице. За целиот свет Твојот Единороден Син ја пролеа Својата Божествена Крв, верувам дека и мене сака и може да ме измие од моите гревови. Затоа заедно со Давид повикувам: го исповедам моето беззаконие. Ти, пак, бидејќи си добар, остави ја нечесноста на моето срце. Се плашам од судот и осудата на луѓето; но пред сѐ во моето срце да биде Твојот страв од неподмитливиот суд и вечната осуда. Ако ми биде извршена неправда, ќе Те молам со зборовите на Давид: Господи, услиши ја мојата правда и избави ме со Твојата правда од осуда. Ако сум направил неправда – со Твојата милост исцели ја мојата неправда. Не оставај го моето срце да посегнува кон лукави зборови, за прикривање на вистината, и кон лажно оправдување. Помогни ми да ја сфатам и замразам мојата неправда: да ја засакам вистината, и во вистината да најдам олеснување за мојата душа. Олесни го бремето на мојата неволја. А ако треба да бидам осуден, да го поднесам тоа со трпение, за очистување на моите гревови и за умилостивување на Твојата правда. Ако бидам засрамен од некои луѓе, да истрпам со смирение, за да Те умилостивам Тебе, Господи, за да не бидам посрамотен пред лицето на светот на Твојот Страшен Суд.

Доаѓам кај Тебе со тага и мака – не лишувај ме од духовна утеха.

Доаѓам кај Тебе помрачен – покажи ми ја светлината од надежта на спасение.

Доаѓам кај Тебе изнемоштен – крени ме и зацврсти ме со Твојата благодат.

Пред сѐ, дај ми желба, и помогни ми, Господи, во сѐ да ја исполнувам Твојата волја, та со мирна совест да Го прославувам Твоето свето име, на Отецот и Синот и Светиот Дух. Амин.    

Кон свети Јован Крстител:

Претечо и Крстителу Христов, Јоване, проповеднику на покајанието! Ти без вина си бил ставен во затвор: јас, пак, сум затворен овде заради моите престапи, и прифаќам дека сум престапник на правдата и законот. Всели во моето срце чувство на покајание за моите гревови! Бидејќи не постои зло, ниту беззаконие кое јас, бедниот, не го направив; преголеми се моите гревови. Учителу на вистината, научи ме вистина да зборувам пред судиите. Не престана и во затворот да го изобличуваш беззакониот Ирод, дарувај ми, најпрво, овде да ме изобличува мојата совест, та од нејзините изобличувања да не можам да го кријам мојот грев. Ако бидам осуден, ќе си ја поднесам казната, дај ми да бидам трпелив, како што ти самиот трпеливо си се однесувал пред отсекувањето на твојата глава, на барање од Иродијада. Да, Крстителу Христов, испружи ја твојата рака, со која го крсти Христос мојот Спасител, кон мене, твоето чедо, та да ме извлечеш од бездната на погибелта. Ти си најголем од родените од жена, ти си прв после Богородица, праведник меѓу луѓето. Затоа прибегнувам кон тебе, имајќи потреба од голем застапник, зашто сум голем грешник. Твојата благодат да ме покрие и мене, недостојниот, Претечо Господов.

Кон свети Николај Мирликијски чудотворец, избавител на неправедно осудените:

О добар наш пастиру и Богомудар наставнику, светителу Христов Николај! Послушај нѐ нас грешните, кои ти се молат и го призиваат на помош твоето застапништво: погледни нѐ нас немоќните, од сите страни притеснети, лишени од секоја добрина, и од малодушност помрачени. Поитај, угоднику Божји, да не бидеме оставени во затвор, да не се радуваат нашите видливи и невидливи непријатели, ниту да умреме во нашите лукави дела. Моли Го за нас недостојните нашиот Создател и Владика, пред Кого со бестелесните ангели стоиш и ти. Измоли Го да биде милостив кон нас во овој и во идниот живот, да не ни дава според нашите дела и според нечистотата на нашите срца, туку според Својата милост да ни возврати.

Се надеваме на твоето посредништво, со твоето застапување се фалиме и твојата помош ја призиваме, и пред твојата икона се поклонуваме, барајќи помош: избави нѐ, угоднику Христов, од злото кое ни се приближува, и скроти ги нападите и неволјите кои се креваат против нас, та поради твоите свети молитви да нѐ бидеме опфатени од бездната, ниту да пропаднеме во гревовната тиња од нашите страсти и гревови. Моли Го, светителу Николај, Христа нашиот Бог, да ни даде мирен живот и прошка на гревовите, на нашите души спасение и голема милост, сега и секогаш и во вечни векови. Амин.

Превод од руски јазик: Свештеник Јани Мулев