Господи Боже наш, Ти она што е разделено го доведе до единство и ја востанови нераскинливата врска меѓу мажот и жената. Од Тебе мажот се соединува со жената со цел да му помага и за да се продолжи човечкиот род. Затоа дај ми и мене Господи, да се сретнам и да се здружам со жена која/(маж кој) ме разбира и на која (кој) би можел да ѝ (му) кажам сѐ. Соедини ме со онаа  која (оној) би ме сакал-а искрено и сопружнички низ целиот живот. Дај ми Господи, да ја (го) пронајдам онаа која (оној кој) ја разликува љубовта од страстите и похотите, Дарувај ми Господи невеста (младоженец) која (кој) секогаш ќе го бара моето срце и мојата душа, а не само моето тело. Ти Самиот Господи, Спасителу, на свет начин изврши таинствен и чист брак помеѓу нас, да бидеме сложни со душата и со телото, меѓусебно да го обогатуваме нашиот брачен живот, еден со друг да не се оставиме осиромашени и упропастени, туку како сопружници да бидеме побожни, еднодушни и задоволително среќни. Преславен Господи, уште ти се молам, мене и на онаа која (оној кој) ја бара мојата душа да ни даруваш во нашиот живот да ја внесеме радоста и Твојот мир, да ја најдеме неминливата љубов со која нѐ љубиш Ти, и да се радуваме на здрави и добри деца. Амин

Молитви за света тајна брак

Прва молитва

                Благословен си Господи, Боже на нашите татковци, кој си ни подарил живот. Ти Господи, си го создал човекот според Својот образ и подобие, од разумна душа и благолико тело, така да телото да ѝ служи на разумната душа. Ти, Господи, си нѐ сочувал од оние кои ја ловат нашата душа, од многуте замки на лукавиот и си нѐ спасил од многу искушенија и опасности до денешниот ден. Затоа, не дозволувај Господи Боже наш, да служиме како сопнување на нашите ближни и нивна соблазна, туку да се покажеме како твои слуги, за да не ни биде напразно Твојата благодат.

                Вооружај не со оружјата на праведноста, зборовите, делата и вистината и подари ни сила низ долготрпението во неволјите, да бидеме со широко срце, ако сме ожалостени, да бидеме секогаш радосни, ако сме сиромашни, да можеме да ги збогатиме другите, како оние кои немаат ништо, а сѐ во Тебе поседуваат, нашиот Отец и Творец, да не се заплеткаме во истиот јарем со незнабошците, зашто праведноста и беззаконието немаат ништо заедничко, што има заедничко меѓу верните и неверните и каква е поврзаноста на Божјиот храм со идолите? А Ти Господи, за своите слуги си рекол: ќе се вселам во нив, ќе живеам со нив, ќе им бидам Бог и тие ќе бидат мој народ. Ќе ви бидам Татко, а вие ќе бидете мои синови и ќерки – вели Господ Седржителот, Кој е богат во својата милост.

                Поради големата љубов со која нѐ засака, подари ни Господи да одговориме достојно на повикот за кој сме повикани, со сета смиреност, кроткост и долготрпение, со љубов да се поднесуваме еден со друг, да го чуваме единството со врските на мирот, да не размислуваме телесно со својот ум и да не бидеме како деца кои ги занесува секој ветар на човечките измами, туку да пораснеме вистински во љубовта на Оној кој е нејзината Глава – Христос, да не живееме како незнабошците во празноумие, со помрачени мисли и чувства, со скаменети срца и отуѓени од Животот поради незнаење. Да не му дадеме место на ѓаволот, како оние кои затупувајќи ѝ се предадоа на распуштеноста вршејќи ја секоја нечистотија со ненаситност, туку да го отфрлиме стариот човек кој се распаѓа во распадливите желби и да се облечеме во нов човек, кој се обновува во ликот на Оној Кој го создал, да бидеме нежни еден кон друг, милостиви, да си простуваме еден на друг како што Бог во Христа ни прости нам. Да го мислиме она што е вистинско и праведно, чисто и достојно за љубовта, она што има добар глас и ја вклучува доблеста, што го примивме и го научивме од нашите отци. Сети се, Господи Боже наш, на нашите родители кои нѐ одгледувале, затоа што молитвите на родителите ги зацврстуваат темелите на домовите. Амин

Втора молитва

Благословен си, Господи Боже наш, Свештенодејствителу на тајниот и чист брак, и Законодавецу на телесното, Чувару на непропадливоста и добар Устроителу на сѐ во животот. Ти, Господару, во почетокот си го создал човекот и си го поставил да владее со созданието, и тогаш си рекол: „Не е добро човекот да биде сам на земјата, да му создадеме помошник сличен на него“, и земајќи едно од ребрата негови тогаш си ја создал жената, која гледајќи ја, Адам рече: „Еве сега коска од моите коски, и тело од моето тело, таа ќе се нарече жена, зашто е земена од мажот свој“. Заради тоа, ќе ги остави човекот таткото свој и мајката своја, и ќе се прилепи за жената своја, и ќе бидат двајцата едно тело, и оние кои Бог ги составил, човекот да не ги разделува. Зашто, Ти, Господи Боже вечен, разделените си ги довел до единство и си ја востановил нивната меѓусебна нераскинлива врска. Заради Тебе жената се соединува со мажот, заради помош и продолжување на човечкиот род. Ти Самиот, Господи Спасителу, на свет начин го правиш бракот таинствен и чист. Затоа дарувај ни и нам, Господи, разум да ја разликуваме љубовта од страстите и похотата, еден со друг да не се оставиме осиромашени и упропастени, туку како сопружници да бидеме сложни, со душата и телото, и живеејќи во вистината и во Твојата љубов меѓусебно да го збогатуваме нашиот живот.

Избави нѐ, Господи Боже наш, од лажното телесно мудрување и од секакво мрачно и темно сладострастие. Смири ги побуните на нашето тело, скроти ги нападите на страстите и изгаси ги распалените стрели од лукавиот кои кон нас подмолно летаат. Сочувај нѐ со Твојата благодат, како што си ги сочувал од огнот тројцата свети момчиња, праќајќи им роса од небото. Нека дојде над нас онаа радост која ја имала блажената царица Елена кога го пронашла Чесниот крст. Сочувај нѐ, Господи Боже наш, како што си го сочувал Ное во ковчегот, како што си го сочувал Јона во утробата на морскиот кит. Сети се и на нас, Господи Боже наш, како што си се сетил на Енох, Сим, Илија, како што си споменал за четириесетте Свои свети маченици, испраќајќи им венци од небото. Подари ни го и нам венецот на Твојата света тајна брак.

Уште те молиме, преславен Господи, да ни го даруваш Својот мир, да внесеме радост во својот живот и да најдеме неминлива љубов со која Ти Самиот си нѐ возљубил, да бидеме сложни и да бидеме на корист и од помош на другите, па да се зарадуваме на здрави и на добри деца. Амин.

Трета молитва

Господи, Кој си се населил меѓу нас и Кој преку апостол Павле си рекол: „Не гаснете го духот, сѐ испитувајте, држете се до доброто, тргајте се од злото во секаков облик, за да се исцели вашата душа и тело“. Боже на мирот, сочувај нѐ беспорочни за светата тајна брак, за целиот наш живот и за доаѓањето на нашиот Господ Исус Христос. Да се украсуваме со добродетели, кои се поскапоцени и поскапи од бисерите, златото и среброто, со чисто срце да се облечеме во праведност. Да останеме во верата, љубовта и светоста, со достоинство и чистота, живеејќи целомудрено да се почитуваме еден со друг, да се радуваме на сѐ, и преку молитва, непрестајно, да Му благодариме на Бог на мирот, Кој е верен на Своето ветување и на Своите избрани. Зашто не сме повикани да му угодуваме на телото, туку сме повикани на слобода, од љубов да служиме еден на друг. Да се утешат нашите срца, да се соединиме во љубовта и во богатството на разбирањето, во познавање на тајните на Бог и Отецот и Господ наш Исус Христос, во Кој се сокриени сите богатства на премудроста и знаењето. Да се соединиме во побожност и љубов, како синови и ќерки да бидеме трезвени, облечени во оклопот на верата и љубовта, со шлемот на надежта во спасението; зашто Господ не ни дал дух на страв и збунетост, туку Дух на сила во љубота и чистотата. Утешителот, Духот на вистината да се всели во нас, преку ревност да се покажува нашата искреност во љубовта, зашто Ти, Господи, си рекол дека по љубовта што ја имаме меѓу себе ќе се познае дека сме Твои ученици. А ние сме слуги Твои, Господи, синови и ќерки Твои. Боже наш, прости ни ги гревовите од младоста наша и не нѐ оставај понатаму. Биди ни покровител и помошник, преку сиот наш живот. Подари ни, Боже, нелицемерна љубов, научи нѐ да истраеме во доброто, да простуваме и да љубиме. Амин.

Превод: Андријан Ѓорѓиев, студент на Теологија и Магдалина Петрушевска, студент на Фармацевтски факултет

Православна светлина бр. 70