ЖИТИЈА НА БОЖЈИ УГОДНИЦИ, КОИ ЗАСВЕТЛИЛЕ ВО ЗЕМЈАТА ВЕЛИКА БРИТАНИЈА
СПОМЕН НА СВЕТИОТ ОТЕЦ НАШ ЧЕД, ЕПИСКОПОТ НА ЛИЧФИЛД, ЧИЈ СПОМЕН ЦРКВАТА ГО СЛАВИ НА 2 МАРТ
(634-672; Chad of Lichfield)
Свети Чед,[1] заедно со својот брат Кед, своето образование го стекнале во манастирот во Линдисфарн, кај неговиот основач – свети Ајдан, а потоа учел кај свети Егберт, во манастирот Ратмелсиги (Rathmelsigi).
Кед го повикал Чед во Англија, за да му помогне во основањето на манастир во Ластинго (Laestingaeu), денешен Ластингем, во Северен Јоркшир. По смртта на Кед, во 664 година, Чед бил избран за втор игумен во Ластинго, а нешто подоцна, по молба на Освиј, кралот на Нортумбрија, бил ракоположен и за епископ на Нортумбрија, со седиште во Јорк.
Во црковната историја е забележан и еден спор околу назначувањето на Чед за епископ во Јорк. Имено, истовремено во Јорк своја епископска имал и свети Вилфрид, но ова прашање било разрешено во 669 година, кога Кентерберискиот архиепископ Теодор одлучил Вилфрид да остане во Јорк, а Чед се вратил во Ластинго.
По смртта на епископот во Мерсија, свети Теодор го помолил кралот Освиј да го назначи Чед за епископ на овдовената епархија. За свое епископско седиште, Чед го избрал Личфилд, каде што набргу по пристигнувањето, основал црква и манастир.
Во првите години од епископствувањето, Чед го основал манастирот во Линдси (Lindsey), на земјата, која ја добил како подарок од кралот Вулфхер Мерсиски (Wulfhere). Набргу потоа го основал и манастирот во Бароу на Хамбер (Barrow upon Humber). Свети Чед ќе остане запаметен како поддражавач на апостолската традиција, зашто низ целата епархија одел пешки.
Светиот епископ Чед починал во 672 година од чума, а неговото житие е исполнето со опишани чудеса, кои се случиле по смртта на неговиот гроб. Неговите свети мошти, кои најпрво се наоѓале во црквата во Личфилд, таму се чувале до Реформацијата, а потоа биле префрлени во црквата, посветена во негова чест, во градот Бирмингем.
Свети Чад денес е прославен како заштитник на областа Мерсија, градот Личфилд, како и на астрономите. Православната Црква неговиот спомен го празнува на 2 март според Јулијанскиот календар.
[1] Чед = востаник.
Source: https://blagovesti.wordpress.com/2017/07/10/%d1%81%d0%b2%d0%b5%d1%82%d0%b8-%d1%87%d0%b5%d0%b4-%d0%b5%d0%bf%d0%b8%d1%81%d0%ba%d0%be%d0%bf%d0%be%d1%82-%d0%bd%d0%b0-%d0%bb%d0%b8%d1%87%d1%84%d0%b
